Gorffennaf 17eg
17/07/2026
Gyfeillion,
Rai blynyddoedd yn ôl byddem yn holi ai rhamantu oedd y rhai hynny oedd yn cyfeirio at hafau pan oedd yr haul yn tywynnu am wythnosau. Hwyrach ein bod yn iawn i ofyn y cwestiwn hyd at eleni. Ond dyma ni yng nghanol haf crasboeth. Er bod rhai ohonom yn mwynhau yr haul (hwyrach yn ormodol) – ma sens i’w gael da bopeth. Bydde cawod neu ddwy yn dderbyniol iawn erbyn hyn a hynny gennym ni i gyd nid yn unig y garddwyr a’r amaethwyr. Pwy bellach all amau newid hinsawdd? Yn anffodus mae ambell un i’w gael!
Y gwirionedd na all unrhyw un (wel unrhyw un call) amau bod ein arferion meidrol ni nid yn unig yn herio a thanseilio trefn Duw ond y creu peryglon i’r cenedlaethau sy’n ein dilyn ni. Beth fydd ein gwaddol ni? A fydd ein plant a phlant ein plant yn diolch inni am yr hyn y maen nhw wedi etifeddu?
Meddyliwch am gyngor doeth yr emynydd – dyma rai ohonynt o’r Caneuon Ffydd:
65, 79, 81, 97,130,160, 246 – a mwy a mwy. Chwiliwch a chwi a gewch!
Ond dyna fe – hen bethau amherthnasol yw emynau.
Ond gadewch inni fynd yn ôl ymhellach at y Diarhebion yn yr Hen Destament.
Pennod 6: 6-8
6 Ti’r diogyn, edrych ar y morgrugyn;
astudia beth mae e’n ei wneud, a dysgu.
7 Does ganddo ddim arweinydd,
swyddog, na rheolwr,
8 ac eto mae’n mynd ati i gasglu bwyd yn yr haf,
a storio’r hyn sydd arno’i angen adeg y cynhaeaf.
Beth – so chi’n licio’r gymhariaeth gyda morgrugyn?
Gallwch droi at Lyfr y Pregethwr hefyd: Pennod 3.
1 Mae amser wedi ei bennu i bopeth,
amser penodol i bopeth sy’n digwydd yn y byd:
Ond dyna fe does na ddim byd yn yr Hen Destament i’w ddweud wrthym ni yn yr unfed ganrif ar hugain!
Gadewch inni droi at y ganrif diwethaf at geidwaid y tir – yr Amaethwyr a rhybudd Dic Jones yn y gerdd Y Cynhaeaf a enillodd y Gadair yn Aberafan yn 1966:
Tra bo dynoliaeth fe fydd amaethu,
A chyw hen linach yn ei holynu,
A thra bo gaeaf bydd cynaeafu
A byw greadur tra bo gwerydu,
Bydd ffrwythlonder tra pery – haul a gwlith,
Yn wyn o wenith rhag ein newynu.
Yn olaf dyma eiriau un o broffwydi ein hoes ni – David Attenborough: –
“Cherish the natural world, because you’re a part of it and you depend on it.”
Digon o bregethu – dw i off i Sbaen i osgoi’r haul sy’n llosgi’r ddaear a’r croen.
Unrhyw ymholiadau yn ystod yr wythnos nesa cysylltwch ag un o’r diaconiaid os gwelwch yn dda.
Cyhoeddiadau:
Dydd Sul 19eg: Pererindod i Eglwys Llandeilo – y gwasanaeth yn dechrau am 11.00 a chinio yn dilyn am 12.45 yn Rhosmaen.
Gorffennaf 26ain: Oedfa Gibeon – yn yr awyr agored – gwasanaeth am 10.30 a wac at olion y gaer Rhufeinig i’r rhai sydd am gerdded i weld yr olygfa. Dewch â chadair a phicnic gyda chi – byddwn yn yr ysgoldy os bydd y tywydd yn anffafriol.
Ni fydd gwasanaeth dechrau Awst – cyfle i fynychu’r oedfa yn yr Eisteddfod.oedfa yn yr Eisteddfod.